رفيق الدّرب

نحب اليوم نشكر صديق عزيز عليّا و نحبوّ برشا و نقول لهاك الشاعر اللّي قال "ثلاثة ليس لهم وجود: الغول و العنقاء و الخِلُّ الودود " راك غالط يا سيّد و هاو الدّليل عندي

كيف بديت نكبر تعلمت برشا حوايج وحدي و الحاجة اللّي يقولولي ما تعملهاش نمشي نعملها بالدرقة و وراء الحيط بش ما يشوفني حد ، تعرّفت على صديق و ولّت ديما نفكّر فيه و من لي كبرت و هو ديما معايا حتّى كيف نسبّو و الاّ ما نكلموش و نبعد عليه ديما وحدي وحدي نرجعلو ، كيف نبدى نقرى معايا كي نمشي للقهوة يمشي معايا يبات ديما معايا فرد بيت ، كيف نتكرّز نفش غُلّي الكل فيه عمرو لا نهار كلمني و وجعني بكلمة ديما يسمع مسكين و ساكت ، كل وين نسافر لبلاصة كيف خيالي ما يفارقنيش ، دخلت للحبس دخل معايا للحبس و قعدنا اكثر من عشرة اشهر انا ما نكلموش و ما ندورش بيه ، نهار اللّي خرجت فكّرت فيه ديراكت و مشيت شبعت فيه بوس و بوس كان من الشفّة ، مشيت لفرانسا طلع معايا نعدي معضم وقتي معاه و ما نجمش نفارقو ، في سهرية في مسيرة في اجتماع في كل حكاية موجود معايا ، حتّى كيف نبدى لاهي برشة ديما بلاصتو ما تتنحّاش ديما بين عينيّا و مش كان انا نحبّو برشا ناس و في العالم الكل زادة و هذا هو الخل الودود اللّي قال الشّاعر ما فمّاش هاو طلع موجود ، ناس بكري ساعات يبدو يصبّوا وراء الطّاس ، ياخي عرفتوه شكون؟

السيد هذا انا خايف نهار اللّي يدور عليّا آش بش يعمل فيّا ، هو في الحقيقة خطير و بشهادة الناس الكل في الكرة الارضية الكل عرفتوه؟؟ ايّا نزيد نبسط شوية ، نهار و طولو و انت تبوس فيه و قدّاش يحلى البوس في اللّيل كيف تبدا كان انت ويّاه وحدكم و ثالثكم كعبات بيرة ولا دبوزة شراب ، كيف تفرح معاك ، كي تبدى حزين ما تلقاه كان هو و يبرّدلك قلبك و اعصابك ترتاح عرفتوه؟؟؟؟

غريبة برجولية كان ما عرفتوهوش ! راهو زادة نار تقدح تشعلو كان انت و تطفّيه كان انت ، ايا حجّايتنا دخلت للغابة و العام الجاي تجينا صابة

صاحبي و صاحبكم اسمو "الــــدّ خّــــــــا ن"