تخربيشة
شبينا ياخي وليّنا هكّا؟ واحد هازز خشمو و لاخر مادد وجهو و الاّخر عامل فيها بطل و تنحّت منكم الانسانية ؟ وين تمشي تسمع كان فلان بيه و فلان عليه ، و البطولات عاد كل واحد يحكي في حكاية جايبها من الحيط ؟ كل وين تجي تفهم تدوخ ؟ ساعات تقول مش لازم نفهم و الله لا يجعلني باش نفهم مالي و مال العباد خليهم يعملوا اللْي في روسهم ، ساعات تقول ياخا شنعمل فيها ها الدنيا و شنية طموحاتي و شنية احلامي ، تبدى تشوف بعينك و الحسرة تاكل فيك لداخل ، قلبك يتعبّى بالحمايص تركبك الفدة و الهلواس و تحس اللّي دايرين بيك الكل ذيوبة ، تلوّج باش تعطي الثيقة في شكون، تلقى تجرّب المرة لولة ياخي تطلعلك حشوة ، تخاف المرّة الثانية بش تعاود تعطي الثيقة ياخي تصيبك الرعشة و تولّي كيما المهبول ، تفد من كل شيء تحط غناية ياخي تزيد تشعل تكره تفد تغص غصّة غصّة ، تقول نمشي نكنكتي شويّة ياخي تلقاها حربت في الفايس بوك ، لابطال ياسر ، سوبر مان ، سبايدر مان ، باتمان ، كوميك ، وين عندك بش تهرب؟ جهنم؟ التزنديق في البلايص الكل ، تحس روحك ذليل ، تسب روحك تسب ربّي تسب اصحابك و مبعّد ؟ الحالة هي هي ما تبدّل شيء ، تقول نهرب نفصع ؟ وين عندك تمشي ؟ تتكيّف قارو ، ثنين ، ثلاثة ، باكو ، وين ماشي ؟هي الصحّة مازالت صحّة ، انتخابات ؟ ناس تقتل في بعضها ، جيران من القهر دارو على بعضهم ؟ الخو يوقف لخوه يسبو ، وين ماشيين ؟ طايرين وطايرة عقولنا ورانا ، اه شبينا وليّنا هكّا ؟ و الاّ نحنا هكا من الاول؟ راسك ماهوش ماكينة بش تفهم كل شيء ، تهبل تدخل في الحلّة ، ثورة؟ كذبة القرن الواحد و العشرين ؟ هاذي شبينا ساكتين ؟ ياخا فايقين و الاّ راقدين .؟ ايّا كي يقولو حشوهالنا بصحتهم و السلام الغدر و الخديعة و ساكتين
